Probeweekend

Jedes Johr gön mir für zwei Dag in unser Probeweekend. Dä Event isch für alli Mitlgieder obligatorisch. Am Samschtig am Morge fahre mir los und chömme am Sunntig am spötere Nommitag widr heime. In dene zwei Dag dien mr neui Lieder üebe und alti Lieder verbessere. Zobe sin jewils no diä Passive, Fründe und Familie iglade zum Grillplausch. Oft höggle mr bis spot ind Nacht gmietlich ums Füür zämme. Musikalisch und au Menschlich isch das Wucheänd ganz wichtig.

Mässbummel

Was wäre mir für Basler, wenn mir nit mindestens 1x and Herbschtmäss gönd. Immer am zweite Mäntig vo dr Herbstmäss dien mir d Proob durch dr Mässbummel ersetzte. Wildi Bahne uf dr Rosetalaalag, fains Ässe bi dr Frässmaile und Schiessbude uf dr Kasärne. Wenn d Liechter ussgönd, nämme diä wo no möge dr alljöhrlichi Schlummertrunk im Klingeli, bevors denn wird Heime goht.

Benefizkonzärt / BBGK

2013 hän mir unser erschts Basler Benefiz Gugge Konzärt organisiert und sind vom Erfolg überwältigt gsy. Jedes Johr hän mir d Unterstüzig vo zahlriche aggtive Fasnächtler und Sponsore. Bis anhin hän mir CHF 69'500 an regionali Organisatione chönne spände. S Benefizkonzärt findet meischtens am erschte Mäntig im Dezämber statt.

Wiähnachtsässe

Im Dezämber findet unser Wiähnachtsässe statt. Mir träffe uns am Samschtig obe imene gmietliche Restaurant, dien fain ässe und für d Unterhaltig isch au immer gsorgt. Natürlich dörfe unseri Passive, Fründe und d Familie bi däm Event nit fähle. Es isch jedes Jorh widr e tolle Obe.

Vorfasnacht

Vorfasnacht isch bi uns jedes Johr anderscht. Jedes Mitglied darf Vorschläg bringe. Mir stimme jewils zämme ab wo mr ahne wänd. Do drbi lege mr immer grosse Wärt druff, das dr d Balance guet chönne halte zwüsche unterwägs und Pause, damit mir sicher no fit sind für d Basler Fasnacht.

Marschprobe

Vor dr Basler Fasnacht träffe mir uns an zwei Sunntige zum zämme e Marschproob mache. Meischtens findet diä erschti Marschproob in dr Lange Erle statt und diä zweiti in dr Grüen 80

Basler Fasnacht

Unser Highlight vo jedem Vereinsjoor. Mir mache drei Daag Basler Fasnacht und lauffe au dr Cortaige. Mir sind vom Mäntig 12.00 (e huffe au bereits ab 4.00) uf dr Gass bis am Donnstig 4.00 
Do drbi wird nur s nötigschte gschlofe und diä 72h in volle Züg gnosse.

Bummel

Am zweite Bummelsunntig träffe mir uns immer zum d Fasnacht ussklinge lo. Dr Dag wird immer vo aggtive Vereinsmitglieder organisiert und isch e Überraschig für alli Mitglieder. S Einzig wo mr jedes Johr zueverlässig mache, isch d Freie-Stroos drab lauffe und uns denn vo dr Fasnacht verabschiede.

Wyteri Events

Unterem Joor hän mir no wyteri Events. Mir spiele an Geburtstag, Hochzyte, Guggefeschter und Waageyweihige. Do drbi luege mr aber immer das es nid Überhand nimmt und mir no voll motiviert sind für d Basler Fasnacht.
Jedi Afrog wird durch unser Event-OK evaluiert und denn vom Verein abgstimmt.